Arestado ang senior citizen nga amay kag duha sini ka bata nga nagapanukot sang P10,000 sa baylo sang water supply sa Brgy 7, Poblacion, banwa sang Moises Padilla, Negros Occidental, sang Biyernes, alas 12:40 sang udto.
Ang mga suspetsado ang ginkilala nga sanday Elmo Nueva Sr, 72 anyos; Mark Ely Nueva, 45 anyos; kag Liza Nueva, 31 anyos; lunsay mga residente sang Sitio Tikoy-tikoy, Brgy Cabacungan, La Castellana, Negros Occidental.
Sa interview sang Bombo Radyo kay PLt Arnolfo Robles, Deputy Chief of Police sang Moises Padilla Municipal Station, nagreklamo ang Punong Barangay sa pagpanukot sang mag-amay sang P10,000 antes nga hatagan sang supply ang mga pumuluyo.
Suno diri, wala sang authority ang mga suspek nga magkontrol sang water supply nga naga-apekto sa apat tutbob sa lima ka brgy.
Sa ginpatigayon nga entrapment operation, nakumpiskar sa amay ang caliber 38 revolver nga loaded sang apat ka live ammunition.
Ang tatlo ang nakahunong sa karun sa Moises Padilla Municipal Police Station nga magapangatubang sang kaso nga Robbery Extortion kag pagbayolar sa RA 10591 ukon Comprehensive Firearms and Ammunition Regulation Act.
