Nakaistoryahanay na ang mag-amay nga 26 na ka tuig nga wala makakitaay, pila ka minutos matapos nga ginpanawagan sa Bombo Radyo Bacolod, Biyernes sang hapon.
Nakig-angot sa Bombo Radyo Bacolod si Melanie Resmundo Dela Cruz, 35 anyos sang Bantayan, Cebu agud nga ipanawagan ang amay nga si Davelyn Dela Cruz nga 26 ka tuig nga wala niya makita kag ginpahibalo nga nagtaliwan na ang iloy nga si Lorna Resmundo Dela Cruz.
Apang samtang ginapanawagan palang sa kahanginan ang pangalan sang amay, nagtawag sa estasyon si Davelyn.
Suno kay Davelyn, mabakal ini kuntani sang tinapay sang may nagsugata nga abyan kag ginpahibalo nga nagapanawagan ang anak sa radyo gani gilayon ini nga nagtawag.
Si Davelyn ang nagapuyo sa Purok Kadena de Amor, Airport Subdivision sa Barangay Singcang, Bacolod City.
Suno diri, gindala sanday Melanie sa Palawan sang nagaedad ini sang siyam ka tuig kag nadulaan na sang contact sa amay.
Gintinguhaan sang bata nga makita pinaagi sa social media apang siya ang napaslawan tubtob nagpadulong ini sa Cebu sang Hulyo agud magbakasyon sa hometown sang napamana.
May nagpanugyan sa iya nga magkontak sa Bombo Radyo Bacolod bangod indi sini makita ang amay sa social media.
Suno kay Davelyn, ginapangita man sini ang anak sa social media apang kaangay lang nga pangalan ang iya nakita gani tuman ang iya kalipay sang naistorya ang anak.
Luyag man sini nga makita kag makaupod ang mga anak sa maabot nga Paskwa.
Nagpahayag naman sang tuman nga kahidlaw si Melanie bangod mabudlay para diri ang wala sang ginikanan nga masugiran.
