Patay ang mag-amay nga lunsay kagawad matapos ginluthang sang riding-in-tandem suspects sa Sitio Napac-an, Barangay Kalumboyan sa ciudad sang Bayawan, Negros Oriental kahapon sang aga.
Ginkilala ang mga biktima nga sanday Felipe Condez, 60-anyos kag Jonesis Condez, 31-anyos kag lunsay kagawad sang Barangay Kalamtukan sa nasambit nga ciudad.
Sa impormasyon nga nakuha sang Bombo Radyo Bacolod, nagaguwa sa imbestigasyon sang kapulisan nga papuli na kuntani ang mag-amay sakay sa ila motorsiklo sang hinali lang ginluthang ang mga ini sang wala pa nakilal-an nga mga suspetsado sang makapila ka beses gamit ang wala pa matumod nga armas-luthang.
Nakaangkon ang duha sang mga igo sang bala sa nagkalain-lain nga bahin sang ila lawas nga gintuna-an sang ila kamatayon.
Sa karon, nagapadayon pa ang imbestigasyon sang Bayawan City Police Station.
