Nagsungka sa Bacolod City Police Office (BCPO) ang mag-amay nga suspetsado sa pagluthang patay sa retired Seaman sa Barangay Pagdugue, Dumangas sa probinsya sang Iloilo sang Hunyo 28 sang aga.
Suno kay acting BCPO Director Police Col. Noel Aliño, nagsungka ang amay nga suspetsado nga si Jesus Dipus Jr. kahapon alas-12:00 sang udto sa Bacolod Police Station 4 samtang ang bata sini nga si Jesus Philip Dipus, ang nagsungka naman kapin alas-7:30 kagab-i sa BCPO Headquarters.
Alas-6:30 sang aga, sang Hunyo 28 sang ginluthang sang amay nga suspetsado ang iya man mismo nga pakaduha nga si Cezar Dipus Jr.
Pahayag sang mga witnesses nga nakita nga nagapalagyo ang mag-amay kag nagsakay sa Ceres bus, gani una sila nga gin-ayam sa Panay Island tubtob sa nakita ang posibilidad sa pagtabok sa Bacolod City kag Negros Occidental agud makapanago.
Suno sa BCPO Director sang nakabatun sang impormasyon gikan sa Iloilo Provincial Police Office nga mahimo nagtabok sa Negros Island ang mga suspetsado, gilayon man sini ginmanduan ang iya guntukod nga tracking team agud pangitaon ang mga suspetsado bangod indi sini luyag nga mangin palanaguan sang mga may sala sa layi ang syudad sang Bacolod.
Nahibaluan naman nga may mga himata ang suspetsado sa syudad sang Bacolod gani kasunod sang pagtanyag sini sang 24 oras nga pagsurrender, gilayon man nga nagsungka ang amay sa Bacolod Police Station 4.
Bangod wala pa nagsurrender ang bata, gilayon man ini nag-issue sang isa pa ka 24 hour notice, tubtob sa natumod sang tracking team nga ini ang yara sa ila himata sa Barangay Villamonte, Bacolod City kag luyag naman nga magsungka.
Ang bata ang ginpasugat man gilayon ni Aliño agud dal-on sa BCPO Headquarters.
Ginapakamaayo sini nga nagkooperar gilayon ang mga suspetsado bangod nakita man nila nga sila gihapon ang mabudlayan ilabi na nga nagapatigayon na sang pursuit operation ang mga kapulisan.
Ang mag-amay ang ginturn-over na sang BCPO sa Iloilo Police Provicial Office, samtang ang Dumangas Municipal Police Station naman ang magapasaka sang tanan nga nagakaigo nga kaso.
