Napatay ang mag-amay matapos nga makuryente sang live wire sang November 9 sang gab-i sa Purok 6, Barangay Nabalian, ciudad sang Himamaylan, Negros Occidental.
Ginkilala ang mga biktima nga sanday alyas Salvado Jr., 56-anyos, laborer kag anak sini nga si alyas Salvador III, 25-anyos lunsay nga pumuluyo sang nasambit nga lugar.
Sa interview sang Bombo Radyo Bacolod kay Police Lt.Col. Anthony Grande, hepe sang Himamaylan City Police Station, kapin alas 7:20 ang takna sang gab-i sang Nobyembre 9, may nabaton sila nga tawag gikan sa ila police personnel nga may yara sang nakuryente sa nasambit nga lugar kag ang mga biktima ang gindala sa Governor Valeriano M. Gatuslao Hospital apang gindeklarar nga dead on arrival.
Suno kay Grande, ginpahayag sang witness nga si alyas Reniel, mga alas 6:00 sang gab-i sang Sabado samtang nagalakat papauli, nakita sini ang biktima nga si alyas Salvador III nga nagahigda kag wala na nagahulag.
Gilayon man sini nga ginpahibalo ang pamilya sang biktima.
Sang nabaton sang amay sini nga si Alyas Salvador Jr ang impormasyon gilayon ini nga nagpadulong sa lugar apang aksidente sini nga natandog ang nagawayway nga electrical wire gani siya ang nakuryente kag natumba.
Ang duha ang lunsay gindala sa ospital, apang gindeklarar nga dead on arrival.
Nakita sa imbestigasyon nga si Alyas Salvador III ang aksidente man nga nakatandog sa live electrical wire samtang may dala nga container nga may unod nga tubig gani ini ang nakuryente.
Suno kay Grande ang nalisdan nga pamilya ang natalana nga magpadulong sa barangay kag nakadepende na sa barangay kun ano ang mabulig sa napatyan bangud sa insidente.
