BACOLOD CITY – Bukas ang Canlaon City Police Station sa imbestigasyon kasunod sang pagkapatay sang mag-amay sa ila nga pag serbe sang search warrant.
Ini ang pahayag sang hepe nga si Chief Inspector Wilfredo Alarcon kasunod sang pagka-luthang patay sang amay nga Ruel Cantero kag bata nga si Jonel sang Sitio Gabok, Brgy. Malaiba ciudad sang Canlaon.
Nahibaluan nga pasado las 7:00 sang gab-i, Myerkules, sang nagpadulong ang Canlaon police sa puluy-an sang mga Cantero agud I-serbe ang search warrant bangud sang gina-suspetsuhan nga naga hupot ang mga ini sang armas apang suno kay Alarcon padulong pa lang ang tropa sang sila ang gin palukpan rason nga nagbalos ang kapulisan.
Napatay ang mag-amay matapos nag-angkun sang nagkalain-lain nga pilas sa lawas.
Narekober naman sa balay sang mga ini ang duha ka cal. 45 nga armas nga gina panag-iyahan sang tagsa sa ila kag kahapon may isa pa cal. 45 nga gin turn-over sa police station.
Naga-suspetso man ang Canlaon PNP nga imbulbado ang mag-amay sa mga kaso sang pag pamatay sa nasambit nga ciudad kag may pila ka mga grupo nga gina-updan ang mga ini.
Gani nga gina-plano na nga I-cross match ang mga fired cartridges nga narekober sa mga nakaligad nga shooting incidents sa Canlaon sa armas nga narekober sa mga Cantero.
