Nalubong na ang mag-asawa nga nga miyembro sang New People’s Army nga napatay sa engkwentro batok sa mga suldado sa Sitio Kulihaw, Barangay Buenavista, ciudad sang Himamaylan, Negros Occidental sang Abril 1.
Madumduman nga nasugata sang mga suldado ang indi magnubo 15 ka rebelde sang Abril 1, alas-3:30 sang hapon.
Matapos ang 15 minutos nga pagbayluhanay sang lupok, napatay ang lider sang grupo kag ginbilin lang sang kaupdanan ang iya bangkay sa Sitio Alolong, Barangay Buenavista.
Siya ang ginkilala kay Elbert Quilano alyas Ka Carding nga lider sang SDG Platoon sang Central Negros II.
Kaupod sini nga napatay ang iya misis nga si Jessa Quilano nga medical officer sang SDG Platoon sang Komiteng Rehiyon Cebu-Negros-Bohol.
Suno kay Brigadier Gen. Inocencio Pasaporte, commander sang 303rd Infantry Brigade, nalubong na sang Abril 3 ang mag-asawa sa public cemetery sang Himamaylan kag yara man ang ila duha ka mga kabataan nga babaye kag isa ka bata nga lalaki.
Suno kay Pasaporte, ang tropa sang gobyerno ang nagfacilitate sang pagpalubong kag ginhatagan ang mga ini sang proper burial.
Ginbuligan man sang Task Force ELCAC kaupod ang 94th Infantry Battalion sang Philippine Army ang pamilya nga nabilin sang mag-asawa.
