Patay ang mag-asawa matapos mabungguan ang ginasakyan nga multicab sang pickup truck sa Barangay Cabangahan, Siation, Negros Oriental alas-11:00 kahapon sang aga.
Sa interview sang Bombo Radyo Bacolod kay Police Major Marve Bolay-og, officer in charge sang Siaton Municipal Police Station, ang multicab ang padulong sa banwa sang Sta Catalina samtang ang pickup truck naman ang padulong sa Dumaguete City.
Ang driver sang multicab ang ginapahayag DSWD employee samtang manunudlo naman sa preschool ang iya asawa.
Suno kay Bolay-og, Pagdangat sa National Highway sang Brgy Bangahan, Siaton, nadulaan sang kontrol ang 82 anyos nga driver sang pickup.
May construction sa lugar gani madanlog ang dalan, rasun nga nagwarik ang pickup truck sa pihak nga lane kun sa diin nagasugata ang multicab.
Moderate lamang ang dalagan sang multicab, apang bangod madasig ang dalagan sang pickup, ini ang nawasak nga nadusdos pa padulong sa kalog.
Total wreck ang multicab samtang dead on the spot naman ang driver.
Ang asawa sini ang nadala paman sa ospital apang ginbawian man sang kabuhi.
Nakahinun-anon na nila ang utod sang napatay nga lalaki nga isa ka pulis, kag kaangay nga wala naman ang mga ini sang interes nga magfile sang kaso, apang luyag nga makahuman sang agreement sa driver sang pickup.
Ang driver sang pickup ang ginabulong man sa karun sa ospital bangod sa naangkon sini nga mga fractures, samtang ang pamilya sini ang nagpasalig na sa mga nalisdan nga pamilya nga sila ang magabulig.
Pahanumdom na lamang ni Bolay-og sa mga motorista nga moderate lamang ang pagpadalagan partikular na sa mga indi kabisado nga lugar, kag permi nga mangin defensive driver.
Ini bangod sa masami, makaluluoy lamang ang mga nagadriver sang tarong, apang nagakaulamid sang mga kamote drivers.
