Nasapwan ang bangkay sang mag-asawa matapos ang pagkasunog sang isa ka balay sa City Heights Subdivision, Barangay Taculing, Bacolod City pasado alas 4:00 sang kaagahon.
Ang balay ang natumod nga ginapanag-iyahan sang pamilya Hibionada.
Sa impormasyon sang Bombo News Team, ginpahayag sang pamilya kag sang mga kaingod nga ang bana nga si Edison Hibionada, 80 anyos ang una nga nasapwan nga wala na sang kabuhi sa sala, kag ulihi nga nakita ang asawa nga si Emelyn Hibionada, 80 anyos.
Suno sa anay kabulig sa balay, ini ang may-ara sang basement ang nasambitan nga balay.
Sa interview sang Bombo Radyo Bacolod kay Rosalie, kaingod sang mga biktima, nagbisita pa ini sa balay sang mag-asawa kahapon sang hapon kag nanotisyaran ang nagapanimaho nga aircon kag daw kaangay nga naga-overheat.
Iya ini ginmuno sa mag-asawa apang wala naman nila ginpadalman.
Ang mag-asawa ang may apat ka kabataan, tatlo ka lalaki kag isa ka babayi, nga gilayon man nag-abot matapos mahibaluan ang sunog.
Sa karun, wala pa sang kumpirmasyon nagikan sa Bureau of Fire Protection tuhoy sa casualties kag kun ano ang gintunaan sang kalayo.
