Arestado ang mag-asawa sa Barangay Balingasag, Bago City ang mag-asawa nga imbulbado sa RGS Investment Scam kag ginpasakaan sang kaso sa Roxas City sa probinsiya sang Capiz.
Pasado alas 6:00 ang takna sang gab-i sadtong Martes, gindakop si Engie Esteves, 39-anyos, nga Vice-President for Operations sang RGS World Marketing Corporation nga nag-operate sa Negros Occidental kag pila ka bahin sang Western Visayas, kag asawa sini nga si Jekha Esteves, 38-anyos, sa gahum sang warrant of arrest sa kaso nga syndicated estafa nga gin-issue ni Roxas City RTC Branch 19 Judge Esperanza Isabel Poco Deslate.
Ang mag-asawa, nga residente sang Purok Rosas, Barangay Balingasag, ang gindakop sa magamay nga hardware nga ila ginapanag-iyahan sa pareho nga lugar.
Sa interview sang Bombo Radyo kay Bago City Deputy Chief of Police Major Ronald Santillan, nakita sa ewarrant sang Bago City Police Station ang warrant of arrest kun sa diin ginbasehan sa pagdakop sa mag-asawa.
Suno kay Santillan, makita man sa warrant of arrest nga madamo sang mga tawo ang nagpasaka sang kaso batok sa ila.
Suno diri, sa karun nakahunong sa Roxas City Police Station ang duha samtang ginaproseso na ang pila ka dokyumento agud nga sila ang maturn-over sa Roxas City Police Station.
Ang duha ang imbulbado sa pyramiding scam sa syudad sang Roxas, Capiz.
