Tatlo ka mga persona ang natigayon nga nadakpan sa ginpatigayon nga entrapment operation sang mga otoridad batoksa mga nagahimo sang peke nga mga vaccination card kag travel certificate sa Cuadra Street, La Purisima Building, Barangay 24, Bacolod City.
Ang mga nagkaladakpan ang ginkilala kanday Loreza Funela, 45 anyos, residente sa Purok Onay, Barangay Bata; Marivic Joros, 44 anyos, residente sa Purok Herva Buena, Barangay Villamonte kag ang bata sini nga si Ivan Joros, 18 anyos.
Ang operasyon ang ginpatigayon sang Bacolod Police Station 1 kag Criminial Investigation and Detection Group (CIDG) samtang nag-upod man sa entrapment operation si Dr. Chris Sorongon, ang deputy for medical sa Emergency Operation Center (EOC) kag iban pa nga vaccinators.
Ginakalipay naman sang doktor nga nangin madasig ang paghulag sang mga uniformed personnel.
Wala naman nakahibalo si Sorongon kun ano ang nagduso sa mga suspetsado nga magpangpeke sang mga dokumento.
Nagpaandam ang doktor sa iban pa nga likawan ang paghemo sang peke nga vaccination card kag travel certificate bangod indi lang ila mga kaugalingon ang ginabutang nila sa alang-alang kundi ang mga pumuluyo.
Panugyan sang doktor nga magpabakuna sang matuod-tuod bangod makita naman sa mga datos kun ano ka epektibo ang COVID-19 vaccine kag kun ano kalala ang epekto sang virus sa mga wala mabakunahan.
Nagalaom si Sorongon nga magaserbe na nga paandam ang pagkadakop sa tatlo agud indi na pagsundon ang iligal nga buluhaton.
Ginahatag naman sang mga ini sa kapulisan kag sa judicial system ang diber sa pagpasaka sang kaso kag pasalig sang doktor nga ang EOC ang nakahanda sa pagkooperar kag paghatag pamatuod nga peke ang mga dokumento.
Nakuha sa mga suspetsado ang pito ka Vaccination Card, pito ka travel certificate, isa ka laptop, isa ka printer, tatlo ka nanarisari nga identification cards nga mahimo ginapanag-iyahan sang ila mga customers kag lima ka panid sang P1,000 bill nga ginalantaw kita sang mga ini sa pagbaligya sang peke nga dokumento.
Suno kay Sorongon ang mga nagbakal sang peke nga vaccination cards kag travel certificate ang may paga-atubangon man nga kaso bangod ang mga ini ang makabig accessory sa krimen.
