Napaidalum na sa autopsy examination ang bangkay sang 24 anyos nga iloy kag duha sini ka kabataan nga ginluthang sang iya live-in partner sa 4th Street, Greenland Subdivision, Barangay 4, Himamaylan City, Negros Occidental alas-6:30 sang aga kahapon.
Suno kay P/Lt.Col. Romeo Vargas, hepe sa Himamaylan City Police Station, matapos ginluthang ni Raymundo Diaz, 59 anyos ang iya nga ka live-in nga si Mary Rose Egca nga nagaselebrar sang ika-24 nga ka-adlawan kahapon kag ang duha sini ka kabataan nga naga-edad pito ka bulan kag isa ka tuig kag siyam ka bulan, gilayon man sini nga gin-utas ang iya nga kabuhi.
Gindala pa sa Bacolod Adventist Medical Center si Diaz apang gindeklarar man ini nga dead on arrival.
Ginkumpirmar sang bata sini sa anay asawa ang pagtaliwan sang iya amay ala-1:00 sang hapon, kahapon .
Suno sa hepe, igarequest man sang mga ini kun magapasugot ang pamilya nga ipaidalum ini sa autopsy examination.
Pasalig naman ni Vargas nga magapadayun ang ila imbestigasyon sa matuod nga gintunaan sang insidente, apang wala na sang mapasakaan sang kaso bangod nadulaan na sang kabuhi ang suspetsado.
Si Diaz ang magapangatubang kuntani sang kaso nga two-counts of murder kag parricide.
Madumduman nga ginpakigbahin man sang timbang sa balay nga nagapanglaba ini sa gwa sang balay, apang sa sulod lang sang compound sang natabo ang insidente.
Yara naman diri ang pito ka bulan nga lapsag.
Pahayag sang timbang nga nagpahayag ang amay nga idaho sa iya ang bata kag kasunod sini gindala man niya ang lapsag sa sulod sang balay kag ginsarado ang piyertahan.
Nagalaom naman ini nga ang pagsirado ni Diaz sang piyertahan ang agud lang malikawan nga makagwa ang 1year and 9 month old sini nga bata.
Apang nakabati nalang ang mga ini sang mga lupok kun sa diin nagsinggit nalang ang isa sa mga timbang nga magdalagan.
Sa pagsulod sang isa pa ka timbang sa likod nga bahin sang balay, nasapwan nalang sini nga nagaligid na kag duguon si Diaz.
Nakit-an man nga may mga buho man sang bala ang glass nga bintana nga naka-atubang sa nagapanglaba nga timbang.
Pahayag pa sang timbang nga kun nakahibalo ini nga may malain nga matabo, wala nalang sini gindaho ang pito ka bulan nga lapsag kag gindalagan nya nalang ini.
Madumduman nga ang mag-iloy ang naka-ilis na antes paman ang insidente bangod plano ni Egca nga magselebrar sang iya kaadlawan sa ila ginikanan sa Sitio Pukatod, Barangay Payao, Binalbagan kasubong man igaselebrar man ang 7th birth monthsarry sang lapsag.
Ginpakigbahin man sang mga timbang nga wala sang dako nga ginbaisan ang duha kag maayo man ang pagkakilala nila kay Diaz.
Apang ginalantaw man ang hinali nalang nga pagbag-o sa iya nga pamataasan matapos nga magsuprer sang pneumonia.
