Patay ang mag-iloy samtang tatlo ka iban pa ang pilason matapos matumba ang truck nga may karga nga tubo sa isa ka balay sa Barangay Antipolo, Pontevedra, Negros Occidental kaina sang kaagahon.
Sa interview sang Bombo Radyo kay Police Lt. Rowell Peniero, deputy chief sang Pontevedra Municipal Police Station, nagikan ang truck sa east direction kag padulong sa west direction sang mabungguan sini ang railings sang dalan, ginabanta ala-1:30 sang kaagahon.
Nagdiretso ang truck sa balay sang mga Cordero sa pihak nga bahin sang dalan kag diri na ini natumba.
Bangud sa kabug-aton sang truck kag sang tubo nga naula, naghaplak ang semi-concrete nga balay kun sa diin nagakatulog ang mag-iloy kag sila ang natabunan.
Bangud sa ila gid nagtupa ang truck, ginbawian sang kabuhi ang 58-anyos nga si Ermie Cordero kag ang 30-anyos nga anak nga si JR Cordero.
Maswerte naman nga nakaluwas ang 12-anyos nga si Leona Cordero nga nag-agom lang sang menor nga pilas, samtang natabuan naman nga wala sa balay ang amay nga Cordero.
Gindala man sa ospital ang driver sang truck nga si Henry Salgado, 46-anyos, kag residente sang Barangay Bi-ao, Binalbagan bangud sa mga pilas nga naagom sini.
Minor injuries naman ang gin-agom sang walo ka tuig nga bata nga lalaki ni Salgado nga kaupod sini sa truck nga magadul-ong kuntani sang tubo sa central sang natabo ang aksidente.
Suno sa manghod ni Ermie nga si Jerry Gregorio, ini na ang ikaduha nga kahigayunan nga may naaksidente nga truck sa tadlong sang balaya sang mga Cordero.
Tinalikdan lang nga tuig suno kay Gregorio, may natumba man nga truck diri apang nakasandig ini sa puno sang paho gani wala nagdiretso sa balay.
Apang sang naglabay ang Bagyo Odette sang Disyembre 17, natumba ang puno sang paho gani wala na sang nagsagang sa truck kaina.
