Nakagwa na sa ospital ang mag-iloy nga ginlabo sa ila mismo nga puluy-an sa Barangay Buenavista, Escalante City, Negros Occidental sang Hulyo 12.
Sa interview sang Bombo Radyo Bacolod kay Police Lt. Albert Sy, hepe sang Escalante City Police Station subong nga adlaw pasakaan sang kaso si Wilson Saramosing, 42 anyos kag residente sang Sitio Cagay 5, Barangay Langub, Escalante City nga ginatudlo nga suspetsado sa paglabo sa mag-iloy nga ginkilala kanday Nora Alpar, 52 anyos kag Noli Jay Alpar, 28 anyos kag mga residente sang Barangay Buenavista.
Nagluntad ang pagpanglabo sang Sabado alas 5:05 sang kaagahon sa balay mismo sang pamilya Alpar.
Sa imbestigasyon sang Escalante City Police Station, temprano pa sang Biyernes nag-inum sang makahulubog nga ilimnon ang bana ni Nora kag ang suspek sa ila nga compound apang sang kaagahon ginsulod sang suspek ang balay sang mga Alpar kag ginpanglabo ang mag-iloy.
Nakaangkon sang minor injuries ang mag-iloy kag gilayon man nga gindala sa hospital kag na-discharge man gilayon.
Suno sa hepe ang gingamit sang suspek sa paglabo sa mag-iloy amo ang lantip nga ginagamit sa pagtapas sang tubo.
Nadakpan man ang suspek sa sulod sang katubuhan samtang dala ang patalom nga gingamit sa pagpanglabo.
Nakuha man sa paghinakop sang suspek ang .27 grams sang suspected shabu bangud ginalantaw sang mga otoridad nga naggamit ini sang illegal nga druga ginpaidalom ini sa drug test kag nagpositibo ang resulta.
Ang suspek ang nakaagi naman ginreklamo sang kalive-in matapos ginsunog ang balay apang wala man ini ginpasakaan sang kaso.
Nakahunong ang suspek sa Escalante City Police Station kag desidido ang pamilya sang mga biktima nga magpasaka sang kaso.
