Padayun ang imbestigasyon sang Escalante City Police Station sa nagluthang-patay sa mag-iloy sa Sitio Lower Lauyan, Brgy. Dian-ay sa ciudad sang Escalante, Negros Occidental.
Ang mga biktima ang ginkilala nga sanday Estelita Lobaton, 81 anyos, balo kag ang bata sini nga si Virgilio Lobaton, 58 anyos samtang wala naman natumod ang suspetsado.
Sa interview sang Bombo Radyo Bacolod kay Police Lt. Suzennie Anne Legada, admin officer sang Escalante City Police Station, ang mag-iloy ang gikan sa pag-inom inom sang makahulubog nga ilimnon kag papauli na kuntani kapin alas-8:45 sang gab-i sang Pebrero 15.
Suno sa isa ka bata nga nauna lamang sa pagpauli, nakabati ini sang madamo nga lupok sang armas luthang.
Sang ila gintsekyar, didto na nasapwan ang mag-iloy nga wala na sang kabuhi.
Pahayag ni Legada nga pagdangat sa madulom nga kakampuhan, didto na ginbantayan kag ginratrat sang luthang ang mag-iloy.
Ang iloy ang nakaangkon sang igo sang bala sa tiyan samtang ang bata ang nakaangkon sang igo sa nagkalainlain nga bahin sang lawas.
Suno kay Legada, wala sang nakawitness sa krimen ka asod-asod nga lupok lamang ang nabatian.
Sa karun padayun ang follow-up investigation sang kapulisan agud matumod ang may kahimuan kag motibo sa krimen.
