Nadakpan na paagi sa hot pursuit operation ang nagtiro-patay sa isa ka lalaki nga nasapwan nga bangkay na sa Purok Yellowbell sa Barangay Binubuhan, Bago City, Negros Occidental kahapon sang aga, Marso 31.
Ginkilala ang napatay nga si Rene Esparesia, 37 anyos, kag residente sang nasambit nga lugar.
Sa imbestigasyon sang Bago City Police Station, ang biktima kag si Richard ang naghalin sa birthday party ni Dionesio Alverio apang samtang nagalalakat papauli nakabati si Richard sang isa ka lupok gikan sa madulom nga bahin sang lugar kun sa diin nabatian man sini nga nagsinggit ang biktima nga “agay naigo ko” kag sang nagbalikid ini wala na ang biktima kag nakabati ini liwat sang asod-asod nga paglupok sang armas-luthang.
Bangud sa kakulba, nagpauli nalang direkta si Richard.
Pagkaaga, Marso 31 alas-6:30 ang takna sang aga nasapwan nga bangkay na si Esparesias nga nakaangkon sang samad sa nawala nga abaga nga naglusot sa pihak nga portion sang lawas sini.
Samtang nakilala naman sang witness ang mag-utod nga ginatudlo may kahimuan sang krimen kag paagi sa ginpatigayon nga hot pursuit operation sang Bago City Police Station nadakpan ang mga ini sa Purok Yellowbell sa Barangay Binubuhan, nasambit nga lugar.
Ginpahayag man nga naglalisay na ang biktima kag ang magutod sa balay palang sang gintambungan nga birthday party nga amo ang ginalantaw motibo sa pagpangluthang.
Sa karun ang mag-utod nga ginkilala nga kanday Marjon kag Denis Puntal nga residente man sang Purok Yellowbell sa Barangay Binubuhan, ang ginpaidalom na sa Paraffin test kag ipaidalom man sa ballistic test ang bala nga nakita sa lawas sang biktima.
Ginahikot na sa karun ang mga papeles agud nga mapasaka ang kaso batok sa mag-utod nga ginatudlo nagtiro-patay sa biktima.
