Arestado ang mag-utod nga ginakabig high value target sang Bacolod City Police Station 3 sa buybust operation nga ginpatigayon sa Progreso Village Arao, Brgy. Vista Alegre ciudad sang Bacolod ala-1:20 kaina sang kaagahon.
Ginkilala ang subject kay Erwin Pepino alyas “Poorboy”, 29-anyos kag residente sang nahinambitan nga lugar, samtang ang utod naman sini ang ginkilala kay Elias Pepino, 51-anyos kag residente sang Prk. Tanigue, Brgy. 1 ciudad sang Bacolod.
Sa interview sang Bombo Radyo kay Police Major Ruel Culanag, hepe sang Police station 3, orihinal nga nagapuyo ang mag-utod sa Brgy. 27 apang nagsaylo ang mga ini sa Brgy. Vista Alegre.
Dugang pa sini nga malapit man duha ka semana ang ila nga pagmonitor antes pa man sila nagpatigayon sang operasyon, bangud apisar nga sa Brgy. Vista Alegre na nagapuyo ang mga ini, apang nagalab-ot sa gihapon ang ila transaksyon sa lugar sang Banago kag nagabagsak man ang mga ini sa Brgy. Singcang Airport.
Nangin target man ang mag -utod sang Police station 4, kag ginatul-id pa karon sang kapulisan kun ano nga kaso ang ginapangatubang sang mga ini.
Nakuha sa paghinakop sang duha ang siyam ka sachet sang suspected shabu nga nagabug-at sang kapin 10 gramos kag may balor nga nagdangat sa 125 mil pesos.
Nagapabilin ang mga ini karon sa kustodiya sang Police Station 3 kag nakatalana nga pagapasakaan sang kaso nga paglapas sa Republic Act 9165 ukon Comprehensive dangerous Drugs Act of 2002.
Date of airing: April 23, 2019
