Dungan na lamang ilubong ang isa ka tuig kag anom ka tuig nga mag-utod nga napatay sa sunog sa Purok Active, Barangay Mandalagan, Bacolod City sang Sabado.
Madumduman nga napatay ang isa ka tuig nga si Adelin Sayun samtang nabutong naman kag nasalbar sang kaingod ang anom ka tuig nga si Angela Sayun.
Ang mag-utod ang nabilin sa balay matapos naglakat ang 14 kag 17 anyos nila nga magulang agud maglantaw sang program sa fiesta, samtang nagatrabaho naman ang iloy bilang stay-in caregiver.
Ang sunog ang gintuga sang kandila nga gintungtong sa plastic container.
Si Angela ang nag-angkon lamang sang 2nd degree burn sa mga butkon kag pila ka bahin sang likod.
Ini ang yara na sa maayo nga kondisyon sa Corazon Locsin Montelibano Memorial Regional Hospital kag excited na kuntani nga magpauli agud makita ang iya manghod, bangod gintago lamang nila ang kamatayon sini.
Ang anom ka tuig ang pinakamalapit sa isa ka tuig nga bata bangod siya ang masami nagabantay kun yara sa eskwelahan ang iya mga magulang.
Apang ini ang nagtaliwan man sa ospital matapos ma-impeksyon ang iya mga pilas, bangod tatlo ka adlaw nga wala madressingan.
Sa interview sang Bombo Radyo Bacolod kay Rosario Cabuguas, lola sang mga kabataan, ginaproseso na sang iloy nga si Estella Cabuguas ang pagdala kay Angela sa ila balay.
Sa karun nakahaya si Adelin sa balay sang ila tiyo nga malapit lamang sa nasunog nila nga balay.
Ang lola ang nagikan pa sa banwa sang Cauayan, kag nagpauli agud mabisitahan man sa ulihi nga tinion ang iya mga apo.
Ginpanugyanan man sini ang iya bata nga magpakabakod kag indi mag-upod sa nagtaliwan nga mga bata bangod wala sang may masagod sa mga nabilin pa sini nga kabataan.
Nahibaluan nga siyam ang kabataan ni Estella, anom sa nagtaliwan na sini nga bana, kag tatlo ang sa karun sini nga karelasyon, nga amo ang amay nanday Angela kag Adelin.
Suno kay Rosario, isa sa bata ni Estella ang natalana naman nga magbata sa bulan sang Oktubre.
Madumduman nga si Estella ang naglumpat sa tricycle, bangod indi sini mabatun nga napatay ang duha sini ka kabataan.
Wala man ini naadmit, apang suno kay Rosario, ini ang nagakiang-kiang kun maglakat.
Kuntani, ipalubong na nila bwas ang bangkay ni Adelin, apang bangod napatay man si Angela, nadesisyunan nga idungan na lamang ang lubong sang mag-utod.
