Ginahulat na lang sang kapulisan sa ciudad sang Kabankalan ang desisyon sang pamilya sang mag-utod nga sakada nga nag-away kag nagresulta sa pagpangbuno kun sa diin isa sa ila ang napatay.
Una diri, naglalisay samtang nagatapas sang tubo Hacienda San Isidro sa Sitio Biaren, Brgy. Linao, Kabankalan City sang Disyembre 9 ang mag-utod nga Alvin Pedro, 45-anyos kag manghod sini nga si Elmer, 25, nga lunsay residente sang Brgy. Uloc, Lawaari, Antique.
Matapos naglalisay, nagbalik sa ila nga quarter si Alvin kag ginsunod ini sang biktima nga si Elmer kag ginhangkat rason nga ginbuno ini sang iya magulang.
Nakaangkun sang pilas sa dughan, nawala nga abaga kag sag-ang ang biktima kag dead on-arrival ini sa Lorenzo Zayco District Hospital.
Sa interview sa hepe sang Kabankalan City Police Station nga si Police Lt. Colonel Jonel Guadalupe, ginahulat nila ang desisyon sang pamilya sang mga ini kun magapasaka pa sang kaso sa suspetsado bangud mag-utod man lang ang duha.
Sa pihak nga bahin, ginpaidalom na sa inquest procedings ang suspetsado nga naglabo-patay sa pareho niya nga sakada sa banwa sang Moises Padilla Municipal Police Station.
Ginkumpirmar sang hepe sang Moises Padilla Municipal Police Station nga si Police Captain Hansel Lumandas nga ginpaidalom sa inquest procedings para sa kaso nga murder ang suspetsado nga si Jane Pescadero, 30-anyos, residente sang Brgy. Montilla kag amo ang nagpatay sa biktima nga si Antonio Clarion, 64-anyos sang nasambit man nga barangay.
Santo sa imbestigasyon sang kapulisan, nagalakat si Clarion sang ginsundan ini sang suspetsado, alas-8:00 sang aga nagligad nga Disyembre 8, kag iya ini ginlabo sang espading.
Nakaangkun sang pilas sa nagkalain-lain nga parte sang lawas si Clarion kag nautod pa ang nawala nga kamot sini.
Samtang ginpahayag sang hepe nga santo sa ila inisyal nga imbestigasyon, may problema sa paminsaron ang suspetsado.
