Pilason ang duha ka mag-utod nga senior citizen matapos ginlabo sang ila manghod sa Barangay Mansilingan, Bacolod City, alas-10:30 kagab-i.
Suno kay P/Lt. Florentino Abalayan, hepe sang Bacolod City Police Station 7, ang suspetsado ang ginkilala kay Harland Robles, 67 anyos, residente sa Tikling St., JJ Gonzaga, Prk. Riverside, Brgy. Mansilingan, Bacolod City.
Samtang ang mga biktima naman amo sanday Julianita Robles, 75 anyos kag Ofelia Robles, 73 anyos, lunsay mga laon.
Suno sa imbestigasyon, manugtulog na ang duha ka biktima sang ila nabatian nga nagamaoy sa gwa sang balay ang manghod kag ginhagyat sila nga maggwa bangud sila ang pagalabuon.
Wala naggwa ang duha ka tigulang kag sang nagsulod ang manghod nga si Harland sa backdoor sang balay bangod ini ini makasulod sa atubang.
Gilayon sini nga ginsulod sa kwarto ang duha ka magulang kag ginpanglabo.
Nasamaran sa nawala nga kamot kag agtang ang isa sa ila samtang sa nawala nga kamot ang pilas nga naagom sang isa.
Nagbato ang mga biktima kun sa diin napilasan sa ulo ang manghod matapos nga ila ginlampusan apang ini ang nakapalagyo.
Ginalantaw naman nga madugay na nagsugod ang indi pag-intindihanay sang mag-ulutod nahanungod sa ginbaligya nga duta nga nagin kabangdanan sang insidente.
Igapasaka naman ang kaso nga frustrated homicide sa nasambit nga suspetsado.////
