Patay ang mag-utod nga sakay sa motorsiklo matapos mabungguan kag ma-arado sang funeral car ukon autofunebre sa National Highway, Brgy Iniban, Ayungon, Negros Oriental.
Ang mga napatay ang ginalakipan sang driver nga si Alyas Shawn, 22 anyos, residente sang nasambit nga Barangay, graduating Criminology student, kag naga-On the Job Training (OJT) sa Ayungon Municipal Police Station; kag ang backrider nga babayi nga manghod sini nga 16 anyos, kag Grade 11 student.
Ang driver sang autofunebre ang ginkilala naman nga si Alyas Jobert, 53 anyos, kasado; kag pahinante sini nga si Alyas Junivie, 26 anyos, lunsay residente sang Brgy Tambo, Ayungon.
Naulamid man sa insidente ang tatlo nga nagalakat sa higad sang dalan nga ginalakipan ni Alyas Anabelle, 53 anyos; Alyas Ranel, 18 anyos; kag isa ka 16 anyos nga babayi; lunsay residente sa lugar.
Sa interview sang Bombo Radyo Bacolod kay Police Master Sgt Archie Ferreron, traffic investigator sang Ayungon Municipal Police Station, ang autofunebre ang nagabyahe gikan sa banwa sang Tayasan padulong sa Ayungon para magdeliver sang wala unod nga casket ukon lungon.
Samtang ang mag-utod ang may pagabaklon lamang kuntani, nga nagabyahe naman sa opposite direction.
Ginalantaw nga naglapaw sa lane ang motorsiklo.
Samtang kun basihan ang damage sa salakyan kag ang skid mark, mahambal naman nga madasig ang dalagan sang L300 van nga autofunebre.
Kun sa diin nagdangat sa 20 ka metros ang kalayuon sang pag-arado sang van sa motorsiklo nga nagresulta sa pagkabuka sang bagol ni Shawn.
Ang driver sang autofunebre ang ipaidalom paman sa operasyon bangod ini ang na-ipit man sa manubela bangod sa impact.
Wala sang nakita nga helmet sa area, apang nagapati si Ferreron nga bisan may-ara sang helmet, sa kakusog sang impact dako ang tyansa nga indi gihapon makasalbar ang biktima.
Samtang minor injuries ukon mga gasgas lamang ang naangkon sang mga bystander nga naulamid.
