Patay ang mag-utod sa nagluntad nga pagpangluthang sa Barangay Taculing, Bacolod City kahapon samtang pilason naman ang isa ka lalaki nga gina-alegar suspetsado sa krimen.
Ang mga biktima ang ginkilala kanday Imee Mahilum kag Aimee Jane Decara kag lunsay mga residente sang Purok Kabugwason, Barangay Mansilingan, Bacolod City.
Samtang ang pilason naman nga yara sa karun sa ospital nga gina-aligar suspetsado sa krimen ang ginkilala kay Alvin Lanza, residente sang Barangay Alangilan, Bacolod City.
Ang 36 anyos nga si Mahilum ang nagatrabaho sa Accounting Department sang Toughstar Engineering Works nga nahamtang sa Lot 3, Block 14, Gonzaga Extension, Doña Juliana Subdivision, Barangay Taculing sa ciudad sang Bacolod kun diin natabo ang insidente.
Kaupod naman sini sa trabaho si Lanza nga isa ka driver-mechanic.
Suno kay P/Capt. Elmer Bonilla, hepe sang Bacolod City Policea Station 6, masami nga ginasugat sang manghod nga si Decara ang magulang pagkatapos sang trabaho.
Magapauli naman ang mag-utod kuntani sakay sa Toyota Revo sang magluntad ang diskusyon sa tunga sang mga ini kag ni Lanza nga nagdangat sa pagpangluthang alas-5:30 sang hapon.
Suno sa pahayag sang mga malapit sa lugar, duwa ka lupok ang nabatian sang mga ini.
Suno kay Bonilla, una nga gintiro sang suspetsado ang driver apang sang manaog ang magulang sa salakyan, gilayon man ini nga ginluthang sang suspetsado.
Gindugang pa sang hepe nga posible nga naubusan sang bala si Lanza gani ginbilin nalang sini ang kalibre 45 nga armas sa sulod sang salakyan sang mga biktima kag gilayon man nga ginbuno ang kaugalingon gamit ang sundang.
Dead on the spot ang mag-utod samtang padayun naman nga ginadapatan sang pagbulong ang suspetsado sa isa ka ospital sa ciudad.
Ginalantaw naman nga isa sa anggulo sang pagpangluthang ang problema sa relasyon.
Narecover nagikan sa crime scene ang duwa ka basiyo sang bala nagikan sa kalibre 45 nga armas, isa ka wala unod nga magazine sang pusil kag ang .45 caliber pistol.
Suno naman kay Arnold Aguilar, driver sang kumpanya, ginsugo ini sang isa sa biktima nga magkuha sang gamit sa opisina nga igasulod sa salakyan sang nabatian sini ang duwa ka lupok.
Hingagaw naman ini nga nagkadto sa lokasyon kag nakita nalang nga wala na sang kabuhi ang mag-utod.
Suno pa sa pahayag sang driver, nakita pa sini nga nagadalagan si Lanza padulong sa likod nga bahin sang opisina.
Samtang pagalantawon man sang mga kapulisan kun nagafunction ang CCTV camera nga yara sa lugar agud nga makabulig sa imbestigasyon.
