Gina-engganyo sang City Treasurer’s Office ang mga pumuluyo nga magbayad sang ila real property tax agud makaangkon sang 20% discount sa advance payment.
Sa interview sang Bombo Radyo kay Bacolod City Treasurer Geovani Balalilhe, ginpahayag sini ng nagpatukod sang temporaryo nga satellite office sa Ayala Malls Capitol Central ang Land Tax Division sang CTO agud makabaton sang advance payments para sa 2021 Real Property Tax kag may yara sang 20% discount kun bayaran ang RPT sang masundo nga tuig ukon ang una kag ikaduha nga quarter sini sa Disyembre 31, 2020.
Suno kay Balalilhe, apisar nga magapadayon sa pagbaton sang mga RPT payments ang CTO sa Bacolod City Government Center, gintukod ang sattelite office sa mall agud maghatag sang dugang nga venue sa mga manugbayad kag indi magginutok sa BGC.
Suno sa iya, ini agud man ma-obserbar sang maayo ang social distancing protocols.
Halin Nobyembre 16 tubtob Nobyembre 27, sarang nga makabayad ang mga tax payers sa Ayala Malls, halin Lunes tubob Biyernes, alas 10:00 sang aga tubtob alas 5:00 sang hapon.
Sumugod naman Nobyembre 28 tubtob Disyembre 30, mangin available ang serbisyo Lunes tubtob Domingo, magluwas lang sa Disyembre 25.
Samtang, magapadayon naman sa pagbaton sang bayad ang BCBC sa regular working days halin alas 8:00 sang aga tubtob alas 5:00 sang hapon.
