70,000 ang ginalauman nga magatambong sa patigayunon nga National Rally for Peace sang Iglesia Ni Cristo sa Negros Occidental Provincial Capitol Lagoon sa Lunes, Enero 13.
Sa interview sang Bombo Radyo Bacolod kay Bacolod Traffic Authority Office Deputy Head Jose Antonio “Jojo” Robello, ang simultaneous activity sang INC sa nanarisari nga bahin sang Pilipinas ang patigayunon halin alas-6:00 sang aga tubtob alas-12:00 sang tungang gab-i.
Sa koordinasyon sang BTAO sa INC organizers, ginalauman ang kapin 70,000 nga partisipante sa bilog nga Negros Island kun sa diin yara sa tres mil ang mga salakyan ang ginalauman nga magasulod sa ciudad.
Bangod sini, ginapaabot na sang BTAO ang paggutok sang trapako.
Sila ang magadeploy sang 70 ka traffic personnel agud maggiya sa trapiko, kun sa diin ang rerouting ang mangin kaangay sa ginpatigayon sang Masskara festival sang ginsarado ang Lacson Tourism Strip.
May 124 naman nga mga ideploy nga kapulisan agud magbantay sang kalinong kag may nakastandby man nga 20 ka ambulance kag duha ka firetrucks.
Bangod Lunes, ginapaabot na nga mangin mabug-at ang dalagan sang trapiko, samtang panugyan naman ni Robello sa mga motorista nga kun mahimo, magpangita sang alternative route.
Samtang kun indi man importe, mas maayo nga ikanselar nalang anay ang mga appointments kun indi luyag nga mahassle sa traffic.
Suno kay Robello, alas-6:00 tubtob alas-12:00 ang full road closure sa bahin sang Lacson Street apang ang programa ang magasugod alas-12:00 sang udto tubtob alas-8:00 sang gab-i.
