Parehas nga napatay ang magbayaw matapos magluthanganay sa Sitio Mambucano, Barangay Cabatangan, Talisay City.
Ang suspect ang ginkilala nga si Alyas Peter, samtang si Alyas Michael naman ang biktima, magkalapit lamang ang balay.
Sa interview sang Bombo Radyo Bacolod kay Police Major Rhazl Jim Jocson, deputy chief of Police sang Talisay City Police Station, ang insidente ang ginakonsiderar “alarm in scandal resulting to death”.
Suno diri sang Marso 13, nagpadulong si Peter sa balay ni Michael kag ginhampak sini ang atop sang bato.
Ginpunggan pa sang asawa si Michael kag ginhambalan nga basi hangin lamang ang naglagapok apang ini ang wala napunggan kag naggwa kun sa diin iya nakomprontar si Peter.
May nagluntad pa nga pagbayluhanay sang tinaga gikan sa duha, nga lunsay yara sa impluwensya sang makahulubog nga ilimnon.
Suno kay Jocson, wala sang may nakawitness kun sin-o ang una nga nagluthang, bangod nabatian nalang nila ang lupok sang pusil.
Si Peter ang may igo sang bala sa dughan kag ulo samtang sa ulo man ang igo ni Michael.
Yara man malapit sa ila mga kamot ang cal. 9mm bareta kag cal. 45 pistol.
Sa imbestigasyon sang Talisay City Police Station, madugay na ang away sang duha.
Wala pa matumod kun ano gid ang rasun sang away nga nagresulta sa pagluthanganay apang ginalantaw nga ini ang mahimo may kaangtanan sa trabaho.
Si Peter ang manager sang cockfighting farm samtang si Michael ang nagabaligya naman sang ginabulang nga manok.
Wala naman sang may mapasakaan sang kaso, bangod ang duha ang lunsay dead on arrivak sang gindala sa ospital.
