Nagapati ang isa sa mga nagfile sang impeachment complaint batok kay Vice President Sara Duterte nga makakuha sila sang numero sang mga senador nga magaboto pabor sa nasambit nga impeachment.
Sa interview sang Bombo Radyo Bacolod kay Magdalo Representative Gary Alejano, sila ang una nga nagfile sang impeachment complaint batok sa bise presidente.
Suno kay Alejano, bisan nga nadugayan nagapasalamat ini sagihapon nga gin-updan sang mga kongresista ang pagduso sang impeachment complaint batok Vice President Sara Duterte.
Dugang pa sini nga ila luyag niya nga pasalamatan ang mga kongresista bangud ang mga ini ang naghimo sang ila mandato santo sa nakasaad sa constitution kag pagduso nga mapanabat ang mga public official sa ila nga ginahimo.
Suno sa kongresista ang una nila nga ginlantaw nga rason sang pagpa-impeach sa bise presidente ang bangud ang psychological state sini ang indi fit agud magpungko bilang public official.
Magluwas sa estado sang paminsaron, ang paglapas man sini sa confidential intelligence fund bilang Secretary sang Department of Education.
Nagapati man ini nga ang ginhimo nila nga pagpasaka sang impeachment batok sa bise presidente ang nagakadapat kag husto nga himuon.
Suno diri, bisan nga may mga kaugalingon nga interes ang mga senador kag ang desisyon ang magadepende sa mga interes sang mga ini dako ang pagpati sini nga himuon nila ang nagakadapat himuon para sa pumuluyong Pilipino.
Nahibaluan nga 215 ka mga kongresista ang nagboto pabor agud nga maimpeach ang bise presidente.
