Opisyal na nga ginproklamar ang mga Senador nga nagdaog sa May 12 national and local elections kahapon, Sabado, May 17.
Ginpangunahan sang Commission on Elections ang proklamasyon sa 12 Senador apang wala nakatambong si Sen. Kiko Pangilinan bangud nagtambong ini sa graduation sang iya bata sa Amerika.
Sa ginpatigayon nga seremoniya, kada Senador ang ginhatagan sang kahigayunan agud nga makahatag sang pila ka minutos nga mensahe.
Samtang gindayaw man ni Comelec Chairman George Erwin Garcia ang maayo nga turnout sa nasambit nga piniliay.
Suno kay Garcia, ang turnout nga nagdangat sa masobra 82 percent ang makabig nga pinakadako nga turnout sa maragtas sang pungsod.
Ginpasalamatan man ni Garcia ang mga kabataan nga botante sa ila partisipasyon sa ginpatigayon nga piniliay.
Suno sa Comelec chair nga gamhanan ang suporta nga ginpakita sang mga kabataan ilabi na nga dako ang porsyento sa mga ini kag dako nga bagay agud magdikta kun sin-o ang masunod nga leader sang pungsod.
Sa pihak nga bahin, dako man ang pagpasalamat ni Senator Elect Christopher “Bong” Go sa tanan nga nagsalig kag nagsuporta sa iya agud nga magpanguna sa ginpili agud mangin senador sa 2025 Senate race.
Espesyal man ang pagpasalamat sini kay former President Rodrigo Duterte nga iya nangin mentor kag kay Vice President Sara Duterte nga nag-endorso sa DuterTen.
Ginplastar man ni Go ang iya nga mga plano sini sa iya ikaduha nga termino.
Pila sa mga plano sini amo ang padayunon ang pagpaduso sang mga pro-poor program kag mga layi ilabi ang sa ikaayong lawas bangud health is wealth.
Suno diri dapat magbuligay ang tanan agud nga magdala sang quality medical services para sa mga Pilipino ilabi na ang mga pigado kag mga indigent nga mga pasyente.
