Patay ang gina-alegar nga magkahagugma nga sakay sa motorsiklo matapos nga makabunggo sa ten wheeler truck sa Purok Halimbawa, Brgy. Tapi, ciudad sang Kabankalan, kahapon alas 4:30 sang kaagahon.
Ang mga biktima ang ginkilala nga sanday Antomark Cacho, 24 anyos, mamumugon kag residente sang nasambitan nga barangay kag ang angkas sini amo ang ginkilala nga si Alyas Inday, 17 anyos, estudyante kag residente sang Purok 3, Barangay Magballo, ciudad sang Kabankalan, samtang ang driver naman sang truck amo si Jonathan Gonzales, 35 anyos, residente sang Purok May-ang, Barangay Tagukon, ciudad sang Kabankalan.
Sa interview sang Bombo Radyo kay Police Captain Joelan Vinzon, Deputy chief of Police sang Kabankalan City Police Station, ang duha ka biktima nagasakay sa motorsiklo nga Kawasaki Bajaj sang hinali lang nag-overlap ang truck sa piyak nga linya rason nga nabunggo-an sini ang motorsiklo.
Bangod sa impact, nag-agom sang mga pilas ang mga biktima kun sa diin si Cacho ang gindala pa sa Kabankalan City Hospital apang ini ang gindeklarar nga dead on arrival samtang ang 17 anyos naman nga estudyante ang gindala sa Lorenzo D Zayco District Hospital apang alas 11:00 sang udto, gindeklarar ini nga patay na.
Samtang, nagpalagyo naman si Gonzales matapos ang insidente sa kahadlok sini sa pamilya sang mga biktima apang nagsurrender man ini sa kapulisan kaupod ang tag-iya sang truck.
