Patay ang magkahagugma matapos nagbunggo ang ila ginasakyan nga Honda Civic sa isa ka Fuso Cargo Truck sa Osmenia Avenue, Hacienda Newton Jison, Barangay 13, Victorias City, Lunes sang hapon.
Sa interview sang Bombo Radyo kay Police Lt. Col. Joseph Fajardo, hepe sang Victorias City Police Station, ang pribado nga salakyan ang ginamaneho ni Alejandre Brotarlo, 28 anyos kag residente sang Roxas City, Capiz, samtang nagapungko naman sa frontseat ang nobya sini nga si Queenie Rocaberte, 23-anyos, residente sang Barangay 5, Victorias City.
Ang truck naman ukon hauler sang kalamay ang ginamaneho ni Juanito Panes, 43 anyos, residente sang ciudad sang Kabankalan.
Suno kay Fajardo, nagabyahe padulong sa Bacolod ang truck samtang padulong naman sa norte ang Honda Civic.
Suno diri, ginalantaw nga madasig ang pagpadalagan ni Brotarlo rason kun ngaa naglapaw ini sa pihak nga linya kag naghead on collision sa truck.
Bangud sa makusog nga impact sang pagkabunggo, nadulaan gid sang kabuhi ang magkarelasyon kag gindeklarar nga dead-on-arrival.
Sa karun yara sa kustodiya sang Victorias City Police Station si Panes kag ginahulat pa ang desisyon sang pamilya kun magapasaka ang mga ini sang kaso.
