Sa sulod sang pito ka bulan nga nagapangatubang sa coronavirus pandemic ang kalibutan, pito naman ka bulan nga nagapakaon sang mga layaw nga mga ido kag kuring ang magkahagugma sa ciudad sang Bacolod.
Sa programa nga Good Morning Philippines, ginpahayag ni Greenfield Ramirez, isa ka animal lover, nga antes pa man nagsugod ang pandemic kag nagpatuman sang enhanced community quarantine sang bulan sang Marso isa na ini ka rescuer sang mga stray dogs kag stray cats sa sulod na sang pito ka tuig.
Nagsugod ang adbokasiya nila sang iya nga nobyo sa pagpakaon sa mga layaw nga kasapatan sang nagpadulong ini sa merkado sadtong Marso, ginharangan ini sang kapin 10 ka mga ido.
Suno kay Ramirez, daw kaangay nga nagapakitluoy ang mga ini sa iya bangud bisan ano niya ka busina, wala ang mga ini nagapahigad.
Bangud sa amo nga hitabo, nagsugod ini sa pagpakaon sa mga layaw nga kasapatan sang Abril 1.
Kada gab-i, duha tubtob tatlo ka oras sila nga nagagwa sang iya nobyo agud magpakaon sang mga stray animals sa ciudad.
Duha ka dalagko nga kaldero nga may unod nga linuto nga karne kag kan-on, lima ka kilo nga dog food kag duha ka kilo nga cat food ang ila dala kada gab-i.
Sa karon nagadangat na sa isa ka gatos ka mga kasapatan ang ila nga ginapakaon kada adlaw.
Nagapasalamat man si Ramirez sa iya mga abyan kag sa iban pa nga mga grupo nga may kapareho niya nga tinutuyo nga nagabulig gid sa iya agud makatipon sang kwarta nga inugbakal sang pagkaon para sa mga layaw nga mga sapat sa Bacolod.
