Nagdangat sa masobra P2.1 million ang balor sang suspected shabu nga narecover sa buybust operation nga ginpatigayon sa Purok Langis, Barangay Banago, Bacolod City.
Ang mga suspect ang ginkilala nga sanday Rachell Sampayan, 23 anyos, babayi, single, wala sang trabaho, residente sa lugar; kag Echero Baldelovar, 24 anyos, lalaki, single, wala sang trabaho kag residente sang Purok Tilapya, Barangay 3, Bacolod City.
Ang operasyon ang ginpatigayon sang Bacolod City Police Office – City Drug Enforcement Unit kag Bacolod Police Station 3 alas-11:45 kagab-i.
Nakumpiskar sa mga suspect ang tatlo ka bugkos ukon knot tied transparent plastic sachet kag pito ka heat sealed transparent plastic sachet sang suspected shabu kalakip na ang buybust item.
Ang suspected shabu ang ginabanta nagabug-at sang 315 grams nga may standard drug price nga P2,142,000.
Sa interview sang Bombo Radyo Bacolod kay CDEU Head Police Lt Col Antonio Benitez, ang mga suspetsado ang maglive-in kag sila ang may tiyangge nga nagaserbe front sa ila illegal nga buluhaton.
Senimana man nila nga ginmonitor ang duha tubtob nga nakabaton sang impormasyon nga may nagsulod nga supply, gani gilayon man nila nga ginkasa ang operasyon.
Suno kay Benitez, mismo ang mga residente sa palibot ang nagkumpirmar nga madamo sang mga pangayaw nga nagasulod sa suludlon kag makitid nga area.
Ang duha ang nadakpan sa propedad sang ila nga tiya.
Sa tion nga maggwa na ang resulta sang crime lab sa pagtsekyar sa suspected shabu, gilayon man nga pasakaan sang kaso ang duha sa pagbaligya kag paghupot sang illegal nga droga.
