Narecover ang masobra P700,000 nga balor sang suspected shabu sa maglive-in partner sa Purok Lampirong, Barangay 2, Bacolod City alas-9:37 kagab-i.
Ang drug buybust operation ang ginpatigayon sang City Drug Enforcement Unit sang Bacolod City Police Office (BCPO-CDEU).
Ang maglive-in ang ginkilala nga sanday Irene Mostoles, 35 anyos, wala sang trabaho; kag Roy Guzon, 45 anyos, tricycle driver, lunsay residente sa lugar.
Narecover sa ila paghinakop ang isa ka knot tied transparent plastic bag kag anom ka heat sealed transparent plastic sachet sang suspected shabu, lakip na ang buybust item.
Ang narecover nga suspected shabu ang ginabanta nagabug-at sang 105 grams nga may standard drug price nga P748,000.
Ang maglive-in ang lunsay yara man sa listahan sang Barangay Anti-Drug Abuse Council (BADAC) kun sa diin ang babayi ang ginakabig nga high value individual samtang ang lalaki ang street level individual, kag sila ang parehas man nga nakaagi na priso bangod sa pagbaligya sang illegal nga droga.
