May previous nga mga kaso ang live-in partners nga ginsalvage sa Sitio Ata-Ata, Barangay San Antonio, Sibulan, Negros Oriental sang Pebrero 20 kag kahapon lang nakilala nga mga residente sang probinsya sang Negros Occidental.
Ang mga biktima ang ginkilala kanday Jennifer Garzola, 27 anyos, residente sang Purok Tuway, Barangay Canmuros sa banwa sang Binalbagan; kag Robby Batalla, 31 anyos, residente sang Hacienda Gallera, Barangay Nanunga, Hinigaran, Negros Occidental.
Sa interview sang Bombo Radyo kay Police Major Ellendie Rebusquillo, hepe sang Binalbagan Municipal Police Station, si Garzola ang nadakpan sa drug buybust operation sa ciudad sang Himamaylan sang tuig 2015 samtang si Batalla naman ang alleged suspect sa kaso nga pagpangawat sa banwa sang Binalbagan.
Halin sa Himamaylan City Jail, ginsaylo kuntani si Batalla sa Kabankalan City Jail apang nakapalagyo.
Suno kay Rebusquillo, wala nakapalapit sa police station ang pamilya sang mga biktima apang nagapakig-angot na sila sa Sibulan Municipal Police Station para sa imbestigasyon sang kaso.
