Patay ang maglive-in partner matapos magbun-anay sa Purok Eucalyptus, Barangay Tabugon, Kabankalan City, Negros Occidental kahapon kapin alas-5:30 sang hapon.
Ang mga napatay ang ginkilala nga sanday Marilie Satinyamian, 26 anyos kag Fernan Pacunla, yara sa 30s ang edad, nagapuyo sa isa ka balay kun sa diin natabo ang insidente.
Sa interview sang Bombo Radyo Bacolod kay Police Lt Roberto Indiape, hepe sang Kabankalan City Police Station, antes ang pagbinun-anay, naglalisay ang duha bangod indi luyag sang lalaki nga magbalik sa Bacolod City ang babayi.
Ang babayi ang nagatrabaho bilang kabulig sa balay sa Bacolod City, samtang laborer naman sa Kabankalan City ang lalaki.
Wala naman nahibaluan kun sin-o ang una nga nagpamuno gamit ang kutsilyo, apang may posibilidad nga dungan nila ini nga ginhimo.
Una nga ginbawian sang kabuhi ang babayi bangod sa pag-angkon sang madamo nga pilas sa lawas, samtang ang lalaki ang gindala pa sa District Hospital sang ciudad.
Apang ini ang ginrefer sa ospital sa Bacolod City, kun sa diin siya ang ginbawian sang kabuhi samtang nagabyahe ang ambulansya sa bahin sang Himamaylan City.
Case close naman ang kaso bangod parehas nga napatay ang involved.
Ang duha ang wala sang kabataan, apang ang babayi ang may bata nga 6 anyos sa iya una nga karelasyon.
Wala man sang witness sa krimen bangod sila ang wala sang kaupod sa balay sang natabo ang insidente.
