Masobra sa P500,000 nga balor sang ginapatihan illegal nga druga ang nakumpiskar sa maglive-in partner sa Purok Neptune, Barangay Singcang- Airport, ciudad sang Bacolod, sang Biyernes, alas- 2:00 sang hapon.
Sa interview sang Bombo Radyo kay Police Captain Melvin Mercado, Officer in Charge sang Bacolod Police Station 8, sa buy-bust operation nga ila ginpatigayon kaupod ang PNP Drug Enforcement Group – Special Operation Unit 6 kag sa suporta sang IMEG Visayas Field Unit, naaresto si Lizel Flores, 40 anyos kag residente sang nasambit nga lugar, apang nakapalagyo naman ang live-in partner sini nga amo ang subject sa buy-bust operation.
Suno kay Mercado, nakumpiskar ang kapin sa 76 ka gramo sang illegal nga druga nga may balor nga kapin sa P516,000.
Pahayag ni Mercado ang naaresto nga si Flores, ang may ka live-in partner man sadto nga isa ka drug personality nga naaresto kag ang trustee sini amo naman sa karun ang nangin ka live in partner ni Flores nga nakapalagyo samtang si Flores naman ang yara na sa kustodiya sang kapulisan.
