Patay ang maglive-in matapos nga ginsulod sa ila nga puluy-an kag ginpaarakan sang tiro sang apat ka wala nakilal-an nga mga suspetsado sa Sitio Mansulao, Brgy San Isidro, banwa sang Toboso, Negros Occidental.
Ang mga biktima ang ginkilala nga sanday Leonardo Lagada, 60 anyos, isa ka mangunguma kag Miguela Hedorio, 65 anyos, lunsay mga residente sang nasambit nga lugar.
Sa interview sang Bombo Radyo kay Police Major Jun Ray Batadlan, hepe sang Toboso Municipal Police Station, nagapuyo sa nabukid nga area ang maglive-in kag malayo sa ila kaingod.
Sa inisyal nga imbestigayson sang kapulisan, samtang yara sa sulod sang ila balay ang duha ka biktima, may apat ka persona nga nag-abot nga nagapangita kay Lagada.// Nagsinggit ang mga suspetsado nga paggwaon si Lagada, apang wala naggwa ang biktima kag gilayon sini nga gintrangakahan ang ila piertahan.
Mahimo nga ginsulod sang mga suspetsado ang ila balay kag sila ginpaarakan sang tiro.
Nag-agom sang pila ka igo sang bala ang duha ka biktima nga gintuna-an sang ila kamatayon.
Pahayag ni Batadlan, ila pagahatagan sang tikang nga indi na maliwat ang amo nga insidente paagi sa pagpasanyog sang ila operasyon batok sa illegal firearms.
Nagpanugyan man ini sa mga residente sang Toboso nga nakahibalo kag may impormasyon sa natabo nga insidente nga makig-angot sa kapulisan.
Naghatag man ini sang kasiguraduhan sa privacy kag safety sa kun sin-o man ang magapalapit kag magahatag sang bulig.
