Masobra sa P1 million nga balor sang illegal nga druga ang nakumpiskar sa maglive-in partner sa Purok Magnolia, Barangay 7, ciudad sang Bacolod, Enero 14.
Ang mga suspetsado ang ginkilala nga sanday Rhodora Madreliño kag Romel Alfar, lunsay mga residente sang nasambit nga lugar.
Sa interview sang Bombo Radyo kay Police Captain Joven Mogato, pinuno sang City Drug Enforcement Unit, masobra na duha ka bulan nila nga ginamonitor ang maglive-in partner kag subject person sa ginpatigayon nga drug buy bust operation amo si Rhodora Madreliño.
Suno diri, may yara sang grupo ang duha sa pagtransaksyon sang illegal nga druga.
Si Madreliño ang nagatinir sa area samtang si Alfar naman ang nagatrabaho bilang drayber nga nagadeliver kag nagakuha sang illegal nga druga.
Suno kay Mogato may yara sang ginahimo nga transaksyon ang maglive -in partner sa sulod sang Bureau of Jail Management and Penology (BJMP).
Dugang pa sini, ang balay nga ginatiniran sang duha ang makaagi naman ginpatigayonan sang buy bust operation kun sa diin naaresto ang bata ni Madreliño angot man sa illegal nga druga.
Nakumpiskar sa duha ang kapin sa 206 ka gramo sang suspected shabu nga ginabanta nagabalor sang P1,400,800.
Nakuhaan man sang isa ka unit sang 9mm pistol nga may isa ka magazine nga loadaed sang lima ka 9mm live ammunition.// Sa karun ang duha ka mga suspetsado ang nakahunong na sa Bacolod City Police Station 2 nga magapangatubang sang nagakaangay nga kaso.
