BACOLOD CITY – Patay ang maglive-in partner matapos nga ginbanggaan kag gin paarakan sang luthang samtang sakay sa ila motorsiklo sa Hacienda Agustina, Brgy. Sag-ang banwa sang La Castellana, pasado las-2:00 kahapon sang hapon.
Ginkilala ang mga biktima nga sanday Jose Milandro Pasoy, 53-anyos, kag Alicia Cabigunda, 51-anyos, pumuluyo sang Hacienda Conchita Villanueva, Brgy. Sag-ang sa nasambit nga banwa.
Suno sa manghod ni Cabigunda nga si Reggie Fernandez, maga tabuay pa kuntani sila sang iya magulang sa merkado publiko sa banwa mga las-4:00 sang hapon agud magduaw sa utod sang ila iloy nga napatay sa Hacienda Mensota, apang wala na ini naka-deretso pa.
Nahibaluan nga padulhog na kuntani ang mga biktima sa banwa gikan sa ila gina-istaran sang gin luthang sang wala pa nakil-an nga mga suspetsado.
Suno kay Fernandez, wala man sila sang nahibaluan nga kontra ang mag live-in partner nga masobra pa lang isa katuig nga naga-upod.
Apang nahisayran diri nga sang nagligad lang nga bulan nag aregluhanay ang mag live-in partner kag si Guillermo Lapas matapos nga nag kinasuhay ang mga ini tuhoy sa duta nga gin paidalom na lang sa Department of Agrarian Reform (DAR).
Nahibaluan nga ang subject sang pag kinasuhay amo ang 47 aryas nga duta nga nahamtang sa Hacienda Conchita Villanueva nga gina panag-iyahan sang una ni Pasoy, apang sang nagbiya ini sa lugar gin kuha naman ni Lapas.
Suno sa hepe sang La Castellana Municipal Police Station, Senior Inspector Jerry Nacion, motibo sang pagpangawat, land conflict kag personal nga hiligut-anon ang ila nga ginatutukan sa pag-bangga kag pag luthang sa mga biktima.
