Magluwas sa pagperform sang Masskara Dancers sang Barangay Granada nga champion sa 2022 Street Dance and Arena Competition sa Bacolod Masskara Festival sa New York sa Hunyo, ang 1st runner up nga Barangay Sum-ag ang magaperform naman sa South Korea.
Sa interview sa Good Morning Philippines kay Councilor Jason Villarosa, chairperson sa Committee on Tourism sang Sangguniang Panlungsod, 22 ka mga Masskara dancers ang magapadulong sa New York para sa pagperform sa Philippines Independence Day Council sa New York kag paga-updan ni Bacolod City Mayor Alfredo “Albee” Benitez, punong Barangay Alfredo Talimodao Jr., City Tourism Officer Ma. Teresa Mananili, kag Councilors’ Jason Villarosa, Celia Flor, Em Ang kag Simplicia Distrito.
Ang Masskara dancers ang magalupad sa Mayo 29 kag magaperform sa Hunyo 4 sa Madison Square Garden sa New York.
Suno diri sa Hunyo 1, sila ang gin-imbetar sang Filipino nga City Councilor man sa New York nga amo ang 1st Filipino assemblyman, para magperform sa 1st state session sang City Council.
Sa Hunyo 2 sila ang magaperform naman sa Good Morning America, nga isa sa mga kilala nga morning shows sa pungsod.
Sa Hunyo 3, sila ang magaperform sa isa ka cruise ship samtang nagalayag sa Hudson River sa New York kag may patigayunon man nga meet and greet sa Bacolod-Filipino community.
Sa Hunyo 4 sa main event, may patigayunon man nga parade, kun sa diin ang Masskara dancers ang magaperform sa street dance samtang may-ara man sila sang kompetisyon nga paga-intrahan.
Suno diri, ang Masskara New York edition, amo man ang naggrand slam sang 2014 tubtob 2016 sa kaangay nga event.
Ang mga dancers ang may duha naman ka adlaw nga bakante agud makalagaw kag sila ang magapauli sa Hunyo 8; samtang siya kag si Councilor Em Ang upod sa anom ka mga dancers ang magalupad padulong sa Los Angeles para magperform sa isa pa ka imbetasyon.
Hunyo 10 tubtob sa 12 naman ang performance sa Long Beach, Los Angeles, California.
Bangod indi na makapagwa ang City Government sang budget para sa kaangay nga aktibidad, nakig-angot naman si Mayor Benitez sa Solaire Hotel and Resorts Manila pinaagi sa Philippine Amusement and Gaming Corporation (PAGCOR) agud nga mangin sponsors samtang kalakip naman sa ginrequest ang para sa pagbyahe sa South Korea.
Samtang ang 10 naman ka Masskara Dancers gikan sa Barangay Sum-ag ang magapadulong sa South Korea sa Mayo 31 agud magperform sa festival sa Busan.
Ginapakamaayo naman nga ang tanan nga expenses kalakip na ang plane tickets kag hotel accomodations ang sabat na sang South Korean government kag ang gastos na lamang sang mga ini amo ang pocket money kag meal allowances.// Nagalaom si Villarosa nga mangin madinalag-on ang performance sang mga Bacolod Masskara Dancers sa Estados Unidos kag South Korea.
