Nagpaandam ang resident volcanologist sang Phivolcs-Negros Occidental sa posibilidad sang pagpasaka sang Bulkan Kanlaon sa Alert Level 3 kag pagluntad sang magmatic eruption.
Apisar nga nagnubo ang narecord nga volcanic earthqauke sa 79 gikan sa 337 kahapon, dako naman ang pagtaas sang sulfur dioxide (SO2) emmission nga nagdangat sa 11,556 tonnes per day gikan sa anay average nga 9,985 tonnes kada adlaw.
Sa interview sang Bombo Radyo Bacolod kay Engr. Mari-Andylene Quintia, ang duha ka parameter upod sa swelling ukon paghubag sa surface sang bulkan ang patimaan sang nagalala nga aktibidad sa sulod.
Gani pahanumdom sini nga dapat magpreparar na ang mga pumuluyo sa posibilidad sang pagsaka sa Alert Level 3 kag pagluntad sang magmatic eruption.
Paathag sini nga mas delikado ang magmatic eruption bangod ini ang may kaupod nga lava flow nga may kaupod nga mga molten rocks kaangay sa natabo sa Mayon Volcano nakaligad nga tuig.
Mas mangin malapad ang kahalitan sini kun ipaanggid sa phreatic eruption sang nakaligad.
Magluwas sa pag-ilig sang lava, yara man ang posibilidad nga may magluntad nga explosion ukon pagsigabong kaangay sa Taal Volcano sang 2020 nga nagtuga sang pyroclastic density current.
Sa tion nga magsaka na sa Alert Level 3, pasangkaron man ang 4-km radius Permanent Danger Zone sa 6-km radius.
Bangod madamo na sang mga lugar nga yara sa sulod sang 6 km radius, kinahanglan naman ang pagpatigayon sang evacuation.
