Gintay-og sang magnitude 3.6 nga linog ang ciudad sang La Carlota takna alas-7:26 kagab-i.
Sa interview sang Bombo Radyo Bacolod kay Engr. Mari-Andylene Quintia, resident volcanologist sa Kanlaon Volcano observatory sa La Carlota City, isa ka volcano-tectonic quake ang natabo.
Nakabatyag sang Intensity III sa amo nga ciudad samtang Intensity II naman sa ciudad sang Bago.
Suno diri, may yara sila sang narekord nga 18 ka mga aftershocks humalin alas-5:00 kahapon sang kaagahon tubtob alas-4:00 sang hapon antes nagluntad ang magnitude 3.6 nga linog.
Suno kay Quintia, indi pa nila karon mabal-an kun ang linog ang nagakatabo bangud may yara sang paghulag sang magma sa Bulkan Kanlaon ukon may yara sang local quakes sa lugar.
Madumduman nga sang Lunes sang kaagahon, nagluntad man ang magnitude 4.7 nga linog kag may yara sang 104 ka mga volcano-tectonic earthquakes nga narekord pagkatapos sini.
Kahapon, nagbuga naman ini sang manipis nga steam.
Sa karon, nagapadayon ang monitoring sang PHIVOLCS sa amo nga bulkan kag nagapabilin ini nga yara sa Alert Level 1.
