Nagbilin sang apat ka mga patay kag 60 ka mga pilason matapos gintay-og sang magnitude 7 nga linog ang Abra kag kaiping nga mga probinsya kaina sang aga, suno kay Department of Interior and Local Government Secretary Benjamin Abalos Jr.
Santo sa report ni Abalos, ang apat ka mga nagkalamatay ang ginalakipan sang duha nagikan sa Benguet, isa nagikan sa Abra kag isa man ang nagikan sa Mountain Province.
Suno kay Abalos ang mga apektado nga mga rehiyon ang ginlakipan sang Rehiyon 1, 2 kag Cordillera Administrative Region (CAR).
Santo sa data, apektado sang pagtay-og sang linog ang 15 ka mga probinsya; 15 ka mga syudad, 280 ka mga banwa kag 6,756 ka mga barangay.
Pila man ka mga dalanon sa Abra ang indi maagyan samtang may yara sang power interruptions sa Abra kag Benguet.
Suno kay Abalos indi man maayo ang linya sang komunikasyon sa Region 1 kag may nagluntad nga landslides sa pila kabahin sang CAR kag minor damages sa pila ka bahin sang rehiyon.
Sa inisyal nga report 29 ka mga dalan ang naguba sa CAR; tatlo ka mga taytay sa Abra ang naguba kasubong man 173 ka mga buildings sang private kag gobyerno ang nagkalaguba bangud sa pagtay-og sang linog.
58 ka mga landslides ang reported kag 31 diri ang nagikan sa Abra.
Padayon naman sa karun ang assessment sang mga otoridad sa lugar nga apektado sang pagtay-og sang linog.
Sa report sang Philippine Institute of Volcanology and Seismology ( PHIVOLCS), ang linog ang una nga ginreport nga magnitude 7.3 nga natabo kaina alas 08:43 ang takna sang aga kag ang sentro sa naaminhan-nakatungdan sang Tayum sa Abra kag may kadalumon nga 17 kilometros.
Nabatyagan man ang mabaskog nga linog sa madamo nga lugar sa Luzon kalakip na ang Metro Manila.
Suno kay Dr. Renato U. Solidum, Jr., officer-in-charge-sang PHIVOLCS, ginakabig ang natabo nga linog nga major earthquake kag ginaulaman ang epekto sini sa mga apektado nga lugar.
Santo sa inisyal nga reports nga nabaton sang PHIVOLCS, nabatyagan ang intensity 7 sa Bocloc kag Manabo Abra kag lauman ang mga halit sa mga pamalay, buildings kag lauman man ang landslides sa mga nabukid nga mga lugar.
Nanotisyaran man sang PHIVOLCS nga nabatyagan ang intensity sa pila ka bahin sang Ilocos Sur.
Nagapadayon naman ang pagtsekyar sang mga otoridad sa mga buildings kag mga pamalay agud nga masiguro nga hilway ini nga mabalikan sang mga nagevacuate nga mga residente.
May yara man sang reported nga indi kinaandan nga pagbalod sa coastal areas sang Launion kag Ilocos kasunod sang linog apan gin-athag ni Solidum nga indi tsunami ang natabo bangud ang tsunami ang matag-as nga pagbalod kasunod sang pag-alsa sang sea floor bangud sa paglinog.
Naeksperyensyahan naman ni Bacolod City Lone District Congressman Greg Gasataya ang linog samtang ginainterview ini sa Bombo Radyo Bacolod via Zoom.
Bangud sa kakusog sang linog, naglingin ang ulo sang kongresista apang wala man sang halit nga natuga sa hotel nga iya ginatiniran.
