Magpakaisa, arestado sa drug buybust operation sa Brgy Mambulac, Silay City

Arestado ang magpakaisa nga nagapuyo sa isa ka balay sa ginpatigayon nga buybust operation sang Silay City Police Station sa Sitio Dacutan Dacu, Brgy. Mambulac, ciudad sang Silay sang Agosto 22.

Ginkilala ang mga suspetsado nga sanday Anthony Benieves, 35-anyos, wala sang trabaho, isa ka street level individual (SLI), kag Hannah Mongcal, 23-anyos, lunsay mga residente sang nasambit nga lugar.

Nakuha sa paghinakop sang mga suspetsado ang siyam ka plastic sachet sang ginapatihan shabu.

Ini ang nagabug-at sang 15 grams kag nagabalor sang kapin P102,000.

Nakahunong na ang magpakaisa sa Silay City Police Station kag magapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.