Patay ang magpakaisa nga lalaki matapos makabunggo ang ginasakyan nga motorsiklo sa nakapark nga truck sa Access Road, Hacienda Baga-as, Barangay Efegenio, Talisay City, Negros Occidental.
Ang mga biktima ang ginkilala nga sanday Nataniel Conde, 18 anyos, driver sang motorsiklo, samtang ang pakaisa naman sini nga backrider amo si Alvin Bendoy, 19 anyos, lunsay mga residente sang Hacienda Mariano, Barangay Bagtic, siyudad sang Silay.
Sa interview sang Bombo Radyo kay Police Captain Dan Salazar, deputy chief sang Talisay Police Station, alas-6:00 sang gab-i, naghalin ang duha ka biktima sa balay sang ila paryente sa Talisay kag nagbyahe papauli sa Silay, nga suno kay Salazar antes nagpadulong sa Talisay, naggikan ang duha sa Dinagsa Festival sa siyudad sang Cadiz.
Suno diri, alas 8:00 sang natabo ang insidente kun sa diin samtang nagabyahe papauli ang duha, nakabunggo ang mga ini sa nakaparking nga truck nga may karga nga bagaso nga ginamaneho ni Elmar Tapalla, 28 anyos, residente sang Barangay Inapoy, banwa sang Mabinay, probinsya sang Negros Oriental.
Sa imbestigayson sang mga kapulisan, may yara sang warning device kag may suga man ang area, apang madasig ang dalagan sang motorsikla sang biktima kag bangod sa maulanon nga tiyempo, madanlog ang dalanon nga ginapatihan rason sang pagkabunggo sang mga ini.
Sa karun gina-imbestigahan pa kun may liability ang truck nga ginhold sang kapulisan, samtang ang drayber naman sini ang yara sa kustodiya sang Talisay Police Station.
