May panugyan ang Victorias City Police Station kasunod sang napatay nga mag-tiyo matapos nga makuryente sa Hacienda Carugiat, Barangay 13, ciudad sang Victorias, Negros Occidental sang Huwebes sang hapon.
Ginkilala ang mga biktima nga sanday Felix Aplasca, 60 anyos kay Dino Aplasca, 19 anyos kag lunsay mga residenteesidente sang Hacienda Alicante, Barangay Pasil, banwa sang E.B. Magalona.
Sa report sang Victorias City Police Station, nagapreparar ang duha nga magkadto sa talamnan sang aksidente nga nakasangit ang karo sang karbaw sa live wire nga nagalaylay sa dalan.
Bangud metal ang karo, nahikapan ini sang 19 anyos kun sa diin nakuryente.
Ginhingagaw naman ini butong sang tiyo apang nakuryente man inin kag gilayon man nga gindala sa ospital ang mga biktima apang lunsay nga gindeklarar nga dead on arrival.
Sa interview sang Bombo Radyo Bacolod kay Police Major Joy Ellaga, Deputy Chief of Police sang Victorias City Police Station, nagpanugyan ini nga dapat ang mga pumuluyo ang mangin vigilante kag dapat ang mga wirings sang kuryente ireport sa electric distributor agud nga makay-o gilayon kag indi na makatuga sang kaangay nga insidente.
Napablotter naman sang Northern Negros Electric Cooperative (NONECO) sa Victorias City Police Station ang insidente kag nagapati si Ellaga nga may yara naman sang pagestoryahanay sa tunga sang NONECO kag pamilya sang mga biktima.
