Aminado ang magulang sang 18 anyos nga lalaki nga ginbuno patay bangud sa pagsinuyaay nga nagresulta sa pagpangastigo sa dalan Lacson, Barangay Mandalagan, Bacolod City nga apisar nga masakit wala na ini sang mahimo kundi ang batunon ang natabo sa iya manghod.
Sa interview sang Bombo Radyo Bacolod kay Yuto Legaste, masakit man ang natabo kag mabudlay nga batunon apang wala na ini sang mahimo bangud indi na mabalik ang kabuhi nga nadula.
Suno kay Yuto sang Lunes sang gab-i gintsekyar pa sini ang iya nga mga manghod kag nakita sini si Hakiru “Yuri” Legaste sa ikaduha nga panalgan sang ila balay nga naga-uyat sang cellphone samtang nagahigda sa sofa.
Suno diri bangud halin pa ini sa Bacolod kag ginkapoy sa pagtrabaho bilang virtual assistant nagpanaog ini agud nga magpahuway sa iya nga hulot.
Wala man ini nakahibalo nga naggwa si Yuri gani nakibot lamang sang siya ang ginpukaw bangod yara na sa ospital ang iya manghod kag wala na sang kabuhi.
Ang ila amay nga Japanese ang madugay na nga napatay kag ang ila iloy ang Overseas Filipino Worker sa Japan gani si Yuto nalang ang nagatindog nga iloy kag amay sa iya nga mga utod.
Masakit ang natabo apang ginpasalamatan sini ang pagtandog sang Ginoo sa balatyagon sang suspek nga nagsungka man agud atubangon ang nahimo nga krimen.
Pasalig sini sa iya nagtaliwan nga manghod nga indi ini mag-untat samtang wala sini nakuha ang hustisya.
Mahidlaw man ini kay Yuri kag sa mga tion nga nagapangayo ini nga buligan sa iya kaangay lamang sang pagpa-enrol sa eskwelahan sa ciudad sang Bacolod.
Si Yuri ang magaeskwela na kuntani sa kolehiyo sa palaabuton nga school year.
