Luyag sang magulang sang babaye nga ginpatay sang iya bana sa banwa sang Murcia nga mapriso ang suspetsado tubtob sa katubtuban.
Sa interview sang Bombo Radyo Bacolod kay Analyn Dela Cruz,magulang sang biktima nga si Alona Hebong, 31-anyos, nagapangayo ini sang bulig agud indi na makaguwa sa prisuhan ang suspetsado nga si Rengie Hebong, 33-anyos.
Indi mabaton sang magulang nga kaangay sang sapat ang pagpatay sang suspetsado sa biktima kun sa diin halos ginhatok-hatok pa niya ini sang labo.
Suno magulang, maayo kun kaisa lang kuntani nga ginbuno ni Rengie si Alona.
Samtang wala nagapati si Dela Cruz sa pahayag sang suspetsado nga mismo si Alona ang nag-ako nga indi si Rengie ang amay sang ila kamanghuran nga bata.
Suno kay Dela Cruz, seloso si Rengie kag halin sang isa pa lang ang ila nga bata ni Alona, masami na ini nga nagapangimon.
Kaina sang aga, gindala na sa Provincal Prosecutor’s Office si Rengie agud ipaidalom sa inquest sa kaso nga murder kag indi parricide.
Nahibaluan nga indi parricide ang ipasaka batok sa suspetsado bangud indi sila legal nga kasal ni Alona kundi paagi lamang sa tribal ritual.
