BACOLOD CITY — Isa ka concerned citizen ang nagpalab-ot sang reklamo sa Bombo Radyo Bacolod may angot sa tuman kahigko nga male comfort room sa Burgos Public Market.
Sa mga litrato nga ginpadala sa social media page sang estasyon, makit-an ang mahigko nga salog kag barado sang higko sang tawo nga inodoro.
Sa interview naman kay Kong Heng Teng, market supervisor sang Burgos Public Market gin-ako sini nga matuod ang nasambit nga reklamo bangud siya mismo ang nakakita sang sitwasyon sang male comfort room nga nahamtang malapit sa vegetables section sang merkado.
Suno diri, guba na nga daan ang isa ka inidoro sa sulod sang banyo samtang ang isa barado man subong man ang drainage system.
May yara man sang duha nga nagabantay sa male CR suno kay Teng kun sa diin ang isa ang nagaduty halin las-6:00 sang aga tubtob las-01:00 sang hapon kag ang isa naman halin las-12:00 sang udto tubtob las-6:00 sang gab-i.
Suno kay Teng kinahanglan na gid nga gub-on ang male comfort room kag kay-ayuhon man ang drainage system.
Dugang pa sini may yara naman sang budget para sa partial rehabilitation sang tatlo ka mga merkado sang ciudad sang Bacolod.
Plano man sang market supervisor nga ipatawag ang nagabantay sang nasambit nga C.R kasunod sini.
