Matugnaw ang panahon sa Japan apang mainit naman ang ginapaabot nga Unification bout nanday Filipino boxer Marlon “The Nightmare” Tapales kag Japanese boxer Naoya “the Monster” Inoue karun sa gab-i.
Sa interview sang Bombo Radyo kay Josel Letrero Palma, Bombo International News correspondent derekta sa Japan, underdog sa match si Tapales apang ipakita sini ang iya ikasarang para sa Pilipinas agud makilala ini bilang pinaka-una nga Pilipino nga may yara sang undisputed super bantamweight world title.
Adlaw sang Martes nag-abot si Tapales kag sunod nga adlaw nagderetso na ini sa boxing gym para magtraining.
Ang boxing gym, amo man ang training ground ni Inoue nga duha ka adlaw nga natapos ang training sini sang nagsulod si Tapales para magpractice.
Kun basehan naman ang experience sang duha, si Inoue may yara sang 40 tanan ka matches samtang si Tapales naman may yara sang 25 ka mga matches.
Sa Unification bout sa undisputed super bantamweight, nakataya ang World Boxing Association (WBA) kag International Boxing Federation (IBF) super bantamweight belts ni Tapales samtang nakataya naman ang World Boxing Council (WBC) kag World Boxing Organization (WBO) belts ni Inuoe, kag kun sin-o man ang magdaog sa hampang, amo na ang maga-uyat sang WBA, IBF, WBC kag WBO belt.
Ang hampang maga-umpisa kapin alas 6:00 ukon alas 7:00 sang gab-i bangod may yara pa sang mga matches antes ang Unification bout nanday “The Nightmare” Tapales kag “the Monster” Inoue.
Samtang, “Anything can happen” naman ang pahayag sang sports analyst kag anay Commissioner sa Philippine Sports Commission para sa hampang nanday Tapales kag Inoue.
Sa interview sang Bombo Radyo Bacolod kay Monico Puentevella, madamo sang posible nga matabo sa ginapaabot nga Unification bout nanday Filipino boxer Marlon “The Nightmare” Tapales kag Japanese boxer Naoya “the Monster” Inoue bangod bisan pa nga nagapanguna sa pila ka rounds ang isa ka boxer paang kun ini maknockout, lain ang mangin resulta sang hampang.
Suno diri, ini na ang tion para kay Tapales nga ipakita nga patulogon sini si Inoue bangod nga indi naman sini kinahanglan pa nga magdaog, indi kaangay kay Tapales nga madamo sang malab-ot pa kag madag-an sa boxing career sini.
