Lunsay nakasulod para sa qualifying rounds sang Little League Philippines National Finals ang Negros Occidental Softball Team nga pagahiwaton sa Abril sa Ilagan, Isabela.
Suno kay Coach Luzviminda Jalandoni, matapos ang Visayas qualifying match nga ginpatigayon sa Pambujan, Northern Samar, ang ila nga Major’s team nga edad 10 tubtob 12 anyos nga naghampang batok sa Tacloban ang parehas nakasulod sa National Finals.
Nangin 1st runner up naman ang Junior’s Team nga edad 13 tubtob 14 anyos samtang ang Senior’s Team nga edad 13 tubtob 16 anyos ang nagchampion batok sa Bago City Softball Team.
Sa kabug-usan 14 ka mga players ang kabahin sa Major’s, 14 sa Junior’s samtang 16 naman ang sa Senior’s team.
Suno kay Jalandoni, ginpropose ang Centralized training bilang preparasyon sang mga kabataan kun sa diin ulupod ang mga ini nga magatraining sa Bacolod City National Highschool.
Nagalaom ang coach nga madaog nila ang tanan nga division.
Gin-estorya naman sang mga ini ang tanan nga division offices sang DepEd kun sa diin kabahin ang mga players agud mapahanugutan ang mga ini sa modular learning.
Suno diri, bangod Abril 9 tubtob 16 ang schedule sang hampang, plano nila nga magpadulong na sa Isabela sa Abril 4.
All out naman ang pagsuporta ni Negros Occidental Governor Eugenio Jose “Bong” Lacson kun sa diin ini ang naghatag sang tanan nga panginahanglanon gikan sa budget sa training tubtob sa galamitun sa paghampang.
Aminado naman si Jalandoni nga dako nga pressure sa ila ang magdaog bangod sila ang anay nagdaog na sa World Series sang 2019, kun sa diin sila ang ginatarget lutuson sang madamo nga mga team.
Nagaserbe naman nga motibasyon sa ila nga mga atleta ang malab-ot ang World Series.
Paathag sang coach nga sa tion nga makuha nila ang title sa National Finals, sila ang magarepresentar sa Pilipinas para sa Asia Pacific Region.
Ang World Series ang natalana naman sa ulihi nga semana sang Hulyo kag una nga senemana sang Agosto sa Estados Unidos.
Apang ginapaathag man sang mga ini sa mga kabataan nga ang paglab-ot sa luwas sang pungsod sa paghampang ang makabig lamang nga consolation price bangod ang pinakadako nga mahimo nila mabatun sa pagpanikasog sa training amo ang makaseguro sang scholarship kag makatapos sa pag-eskwela nga wala sang gasto ang mga ginikanan tubtob sa kolehiyo.
